يا أهل الدراهم .. كيف حال الدراهم .؟
هي ما تخليكم شوي..وتجينا
ماتطلع من دروجكم ونتفاهم !
بالله خلوها تسير علينا
نذبح بها الفقر،وخطر هالمداهم
ونحيي بها اموات عليهم بكينا
ونمسح بها الاوجاع مثل المراهم
ونسوق منها ما يطول يدينا
نطنخ بها طنخة ثقيل وفاهم
يطرب لا احد قال يبن الذينا
ونخلي الي ما معاهم..معاهم
ياطيبنا..يوم السعد يوم جينا
انلمها من عيون من لا نراهم
ونطشها لعيون من يرتجينا
ننقذ بها من عثرب الوقت ماهم
ونزرع بها بسمات من يلتقينا
ونسقي بها الهلكا ونقطع ضماهم
ونلقا بها الي بالأمل يحترينا
ونصلح بها الي رافضين التفاهم
ونعتق بها الارقاب لامن سعينا
ونجمع بها اثنين تعسر لقاهم
ونكفل بها الي فاقدين الثنينا
ونهدم ديون المعسرين وشقاهم
ونبني بيوت الركع الساجدينا
ونرسم بها حلم الصغار ومناهم
ونحط بعض الشي للي يلينا
وبحق .. لو مازاد سهم المساهم
وعادت دراهمكم دبل ما خذينا
عز الله ان اكثركم يعيش واهم
ان ما لقيتو للمسرات مينا
اخياركم لو ما ركضنا وراهم
حنا من انفسنا العزاز اغتنينا
نزحف على خط الفقر ونتزاهم
وانتو ما احد منكم نظر في حدينا
الله اعلم وش كان حال الدراهم
لو بيت مال المسلمين بيدينا
الشاعر ناصر القحطاني
